troula_cia

Por segunda vez, e despois de atravesar media Europa, vimos de participar nun dos festivais multiculturais máis importantes do mundo, o Sziget, que se celebra na cidade de Budapest (Hungría), onde participan artistas e acude público de todos os recunchos do planeta nun intercambio incrible de arte, música, teatro, circo e artes de rúa.

Para unha pequena compañía galega de animación e teatro de rúa, é un gran orgullo estar presente nunha programación así, con 1000 espectáculos en 6 días e con artistas de gran nivel e calidade.

Durante estes días traballamos arreo con xentes de todas as partes do mundo e coa organización (que sempre nos tratou como parte da súa familia), intentando deixar a pegada da nosa arte e da nosa enerxía como levamos facendo durante 23 anos.

Hai un par de meses, cando xa levabamos tempo traballando na preparación e produción do noso espectáculo " Hexagonum" no festival, enterámonos pola prensa da participación de fondos de inversión vinculados a políticas proisraelís que non son do noso agrado en numerosas multinacionais que nos rodean día a día e en moitos dos festivais máis importantes do mundo, un deles o Sziget. Dentro do noso xeito de entender as cousas, nun mundo que cada día é máis complicado, inxusto e convulso, e tras múltiples reflexións, decidimos que a nosa “loita” contra toda esta lacra sería donar parte do noso beneficio empresarial pola participación no festival ás vítimas do xenocidio en Palestina, sendo conscientes de que é un mínimo gran de area nunha situación que nos entristece e nos enche de rabia e impotencia.

Durante 6 días na Illa de Obudai, no Danubio, xúntanse máis de 500.000 persoas de diferentes culturas, razas e realidades , convivindo en paz e armonía, nun intercambio multicultural étnico marabilloso; oxalá algún día o mundo sexa un lugar máis habitable onde podamos convivir respectando e amando as nosas diferenzas.

Nós seguiremos facendo o que sabemos facer dende sempre, levar a nosa arte ás rúas.

Seguimos con máis enerxía e con máis experiencias na mochila, crecendo artística e personalmente.

#vémonosnasrúas
@jorgeguerrafdz @joseavion @anashiyu @shiyu.ana @borjacalvar @diego_roca76